Unang Siglo ng Nobela sa Filipinas

Virgilio S. Almario

Ano ang epekto ni Rizal sa mga nobelistang Filipino'? May kinalaman ba ang pananakop ng mga Amerikano sa pagsigla ng nobelang sentimental bago sumiklab ang Ikalawang Digmaang Pandaigdig? Bakit nauntol ang pagdami ng mambabasa ng nakaaklat na nobela sa unang mga dekada ng siglo 20? Maituturing bang pagsulong ang popularidad ngayon ng romance novels?

Ilan lamang ito sa mga isyu't problemang tinalakay ni Virgilio S. Almario, Pambansang Alagad ng Sining para sa Panitikan at iginagalang na kritiko, sa kaniyang pagbabalik sa unang siglo ng nobela bilang anyong pampanitikan sa Filipinas. Binigyan ni Almario ng kaukulang balangkas ang kasaysayan ng nobela mula sa panahon ni Rizal, tinukoy ang mga kahinaan ng marami sa mga nobelang popular, bagaman nag-uukol ng higit na sikap kung paano dapat pahalagahan ang nobela bilang isang sangay ng kabuuang panitikang Filipino.

Ang ibig sabihin, malakas ang adhika ng panunuri ni Almario upang sipatin ang kasaysayan at katangian ng nobela bilang produkto ng talino at kasaysayang Filipino. Sa ganito, unang nais niyang itakwil ang lubhang pagsandig sa teorya't panunuring pampanitikang banyaga samantalang ginaganyak niya ang lahat sa pagtuklas at pagbuo ng kritisismong nagmumula sa pananaw na Filipino at may mithiing pasibulin ang orihinal na birtud ng sining at kulturang Filipino. Masikap siya kahit sa paglikha ng bagong wika ng kritisismo bilang isang makabuluhang tungkulin sa paglinang ng mga kasangkapang pampamumuna na higit na nagsasaalang-alang sa pagiging Filipino ng panitikan.

Shipping valid to all countries

PHP 290.00  Approx. $6.44